पुणे, ९ सप्टेंबर: पुणे जिल्ह्यातील हडपसर (Hadapsar) येथे एका भरधाव डंपरच्या (Dumper) धडकेत एका १९ वर्षीय तरुणाचा जागीच मृत्यू झाल्याची दुर्दैवी घटना घडली आहे. डंपरचालक अपघात घडल्यानंतर कोणताही मदत न करता घटनास्थळावरून पसार झाला आहे.
काय आहे प्रकरण?
ही घटना ८ सप्टेंबर, २०२५ रोजी रात्री ७ वाजताच्या सुमारास हडपसरमधील जेएसपीएम कॉलेजजवळ, अहिल्यादेवी होळकर चौकात घडली. काळेपडळ पोलिसांनी दिलेल्या माहितीनुसार, एका ४२ वर्षीय व्यक्तीने याप्रकरणी तक्रार दाखल केली आहे. फिर्यादीच्या मेव्हण्याचा मुलगा अभिजीत गणेश रेवले (वय १९) हा त्याच्या मोटरसायकलवरून जात असताना, एका अज्ञात डंपरने त्याला जोरदार धडक दिली.
प्रत्यक्षदर्शींनी दिलेल्या माहितीनुसार, डंपरचालकाने वाहतुकीचे नियम धाब्यावर बसवून, वाहन अत्यंत हयगयीने आणि भरधाव वेगात चालवले. यामुळे त्याने अभिजीतच्या मोटरसायकलला जबर ठोस मारला. या अपघातात अभिजीत गंभीर जखमी झाला आणि त्याचा जागीच मृत्यू झाला.
अपघात घडल्यानंतर डंपरचालक कोणताही मदत न करता किंवा पोलिसांना माहिती न देता पळून गेला.
या प्रकरणी, पोलिसांनी अज्ञात डंपरचालकाविरुद्ध काळेपडळ पो.स्टे. गु.र.नं. ३५८/२०२५, भा.न्या.सं.क. १०६, २८१ आणि मो.वा.का. कलम १८४, ११९/१७७ नुसार गुन्हा दाखल केला आहे. पोलिस उपनिरीक्षक विनायक गुरव या प्रकरणाचा पुढील तपास करत आहेत.