पुणे, ६ सप्टेंबर: पुणे जिल्ह्यातील भोसरी (Bhosari) येथे जुन्या भांडणाच्या कारणावरून १२ हून अधिक तरुणांच्या टोळक्याने एका घरात घुसून मोठा धुमाकूळ घातला. आरोपींनी घरात तोडफोड करण्यासोबतच घरासमोरील वाहनांचेही मोठ्या प्रमाणात नुकसान केले. या घटनेमुळे परिसरात दहशतीचे वातावरण निर्माण झाले आहे.Gang violence in Bhosari:
काय घडले?
हा प्रकार ३ सप्टेंबर, २०२५ रोजी रात्री ११.३५ वाजता भोसरीतील खंडेवस्ती, सेक्टर नंबर १० येथे घडला. फिर्यादी सूरज जयसिंग जाधव (वय १८) यांनी एमआयडीसी भोसरी पोलिस स्टेशनमध्ये तक्रार दाखल केली आहे. फिर्यादीने दिलेल्या माहितीनुसार, तो घराबाहेर थांबलेला असताना जुन्या भांडणाच्या कारणावरून आरोपींनी त्याच्या घरावर हल्ला केला.
आरोपींपैकी काही जणांनी लोखंडी रॉड आणि काठ्या घेऊन हवेत फिरवत परिसरात दहशत निर्माण केली. त्यांनी भांडण सोडवण्यासाठी आलेल्या लोकांनाही धमकावले. यानंतर, तीन आरोपींनी हातातील दगडांनी दरवाजावर मारून घरात प्रवेश केला. त्यांनी घरातील सामान अस्ताव्यस्त करून नुकसान केले.
घराबाहेर वाहनांची तोडफोड
घरातून बाहेर आल्यानंतर टोळक्यातील इतर आरोपींनी फिर्यादीच्या आई-वडिलांना शिवीगाळ केली आणि त्यांना धमकी दिली. एका आरोपीने फिर्यादीच्या यामाहा आर१५ (MH14/LC/6916) या मोटरसायकलच्या पेट्रोल टाकीवर लोखंडी रॉडने मारून तिचे नुकसान केले. तसेच, इतर आरोपींनी दोन रिक्षांच्या (MH14/GC/2393 आणि MH14/T/9369) पुढील काचा दगडाने फोडून मोठ्या प्रमाणात नुकसान केले.
या प्रकरणी, पोलिसांनी १२ आरोपींपैकी ४ जणांना अटक केली आहे. आरोपींची नावे: १. प्रतीक प्रशांत जावळे २. ऋषिकेश विकास लष्करे ३. प्रीतम सुधीर जावळे ४. देवांश उर्फ इल्या ५. साहिल तुपसाँदर ६. शुभम उर्फ भुत्याशिंदे ७. अनुजकुमार ८. निखिल कांबळे ९. अनुज जाधव १०. प्रेम शर्मा ११. प्रेम शिंदे १२. भुऱ्या
अटक करण्यात आलेल्या आरोपींची नावे ऋषिकेश लष्करे, साहिल तुपसाँदर, निखिल कांबळे आणि प्रेम शर्मा अशी आहेत. या सर्व आरोपींवर भारतीय न्याय संहिता कलम १८९(२), १८९(४), १९१(२), १९१(३), १९०, ३३३, १२५, ३२४(४), क्रिमिनल लॉ अमेंडमेंट कलम ३, ७ आणि महाराष्ट्र पोलीस अधिनियम कलम ३७(१) सह १३५ नुसार गुन्हा दाखल करण्यात आला आहे. पोलिस उपनिरीक्षक इंगळे या प्रकरणाचा पुढील तपास करत आहेत.