Pimpri: Samrat Chowk पिंपरी परिसरात गुन्हेगारीच्या घटना वाढत असताना पुन्हा एकदा एका धक्कादायक घटनेने नागरिकांमध्ये चिंतेचे वातावरण निर्माण झाले आहे. सम्राट चौकातील मैत्री बौद्ध विहाराजवळ २५ ऑक्टोबर २०२५ रोजी रात्री एका तरुणावर जुन्या वादातून जीवघेणा कोयता हल्ला करण्यात आला आहे. या प्रकरणी तीन विधीसंघर्षित बालकांविरुद्ध खुनाच्या प्रयत्नाचा गुन्हा दाखल करण्यात आला असून, हल्ल्यात तरुण गंभीर जखमी झाला असून त्याच्यावर रुग्णालयात उपचार सुरू आहेत.
मिळालेल्या माहितीनुसार, ही घटना २५ ऑक्टोबर २०२५ रोजी रात्री सुमारे ८.३० वाजता पिंपरी येथील सम्राट चौकाजवळच्या मैत्री बौद्ध विहारासमोर घडली. फिर्यादी अरिफ हनीफ शेख (वय २३, व्यवसाय रिक्षा ड्रायव्हर, रा. मोरवाडी, पिंपरी) व त्याचे मित्र केवीन सोनवणे आणि जावेद सलीम शेख (वय १७, रा. मोरवाडी) हे त्यांच्या रिक्षामध्ये बसलेले असताना ही घटना घडली. त्याचवेळी अंदाजे १७ वर्षे वयाचे तीन विधीसंघर्षित बालक मोटारसायकलवरून तिथे आले. जुना वाद मनात धरून त्यांनी जावेदवर हल्ला चढवला.
या हल्ल्यात, विधीसंघर्षित बालक क्रमांक १ याने त्याच्याकडील लोखंडी कोयत्याने जावेदच्या डोक्यात डाव्या बाजूला, पाठीत डाव्या बाजूला आणि उजव्या हातावर गंभीर वार केले. तर विधीसंघर्षित बालक क्रमांक २ आणि ३ यांनी जावेदला शिवीगाळ करत हाताने व लाथाबुक्क्यांनी मारहाण केली. या तिघांनी संगनमत करून जावेद सलीम शेख यास जिवे ठार मारण्याच्या उद्देशाने गंभीर जखमी करून खुन करण्याचा प्रयत्न केला आहे. या जीवघेण्या हल्ल्यात जावेद गंभीर जखमी झाला असून त्याला तातडीने रुग्णालयात दाखल करण्यात आले आहे, जिथे त्याच्यावर उपचार सुरू आहेत.
या प्रकरणी, अरिफ हनीफ शेख यांनी दिलेल्या फिर्यादीनुसार, संत तुकाराम नगर पोलीस ठाण्यात २६ ऑक्टोबर २०२५ रोजी पहाटे ३.३४ वाजता गुन्हा दाखल करण्यात आला आहे. भारतीय न्याय संहिता कलम १०९, ११५(२), ३५२, ३५१(२)(३), ३(५), भारतीय शस्व अधिनियम कलम ४ (२५)(२७) आणि महाराष्ट्र पोलीस अधिनियम कलम ३७(१), १३५ अशा विविध गंभीर कलमांखाली हा गुन्हा नोंदवण्यात आला आहे. पोलिसांनी घटनेचे गांभीर्य लक्षात घेऊन विधीसंघर्षित बालकांचा शोध सुरू केला असून त्यांना ताब्यात घेण्यासाठी पोलीस पथके रवाना करण्यात आली आहेत.
पिंपरीसारख्या वर्दळीच्या ठिकाणी अल्पवयीन मुलांकडून अशा प्रकारे खुनी हल्ला होणे ही एक गंभीर आणि चिंताजनक बाब आहे. वाढती गुन्हेगारी आणि त्यात विधीसंघर्षित बालकांचा सहभाग हा सामाजिक प्रश्न बनत चालला आहे. या घटनेमुळे स्थानिक नागरिकांमध्ये भीतीचे वातावरण असून, पोलिसांकडून कठोर कारवाईची आणि परिसरात अधिक गस्त वाढवण्याची मागणी केली जात आहे. संत तुकाराम नगर पोलीस या प्रकरणाचा सखोल तपास करत असून, दोषींवर कठोर कारवाई केली जाईल असे आश्वासन त्यांनी दिले आहे.