Pedestrian dies after being hit by unknown speeding vehicle:पुणे-मुळशी येथील लवळे रोडवर राजयोग हॉटेलसमोर एका भीषण अपघातात (Accident) एका पादचाऱ्याचा मृत्यू झाला आहे. एका अज्ञात वाहनाने धडक दिल्यानंतर चालक घटनास्थळावरून पळून गेला. या घटनेने परिसरात हळहळ व्यक्त होत आहे. बावधन पोलिसांनी गुन्हा दाखल केला असून, अज्ञात आरोपीचा शोध घेण्यासाठी तपास सुरू केला आहे.
गुन्ह्याचा तपशील:
हा अपघात ३१ ऑगस्ट, २०२५ रोजी रात्री ८ वाजण्याच्या सुमारास घडला. मयत व्यक्तीचे नाव संतोष असून, ते लवळे गावातील रहिवासी आहेत. त्यांचे भाऊ सचिन बाळू बोराटे (वय ३७) यांनी याप्रकरणी तक्रार दाखल केली आहे. फिर्यादीने दिलेल्या माहितीनुसार, त्यांचा भाऊ संतोष हा लवळे गावातून पायी चालत त्यांच्या घराकडे जात होता. त्यावेळी एका अज्ञात वाहनाने वाहतुकीच्या नियमांकडे दुर्लक्ष करत, निष्काळजीपणे आणि भरधाव वेगात येऊन त्याला पाठीमागून जोरदार धडक दिली.
या धडकेमुळे संतोष यांच्या डोक्याला आणि चेहऱ्याला गंभीर दुखापत झाली. त्यांना तात्काळ रुग्णालयात नेण्यात आले, परंतु उपचारादरम्यान त्यांचा मृत्यू झाला. या अपघातानंतर, वाहन चालक कोणताही मदत न करता किंवा पोलिसांना माहिती न देता घटनास्थळावरून पळून गेला.
या प्रकरणी बावधन पोलिस स्टेशनमध्ये बी.एन.एस. २०२३ चे कलम २८१, १०६ (१), मो.वा.का. कलम १८४, १३२ (१)(क), ११९/१७७ अंतर्गत गुन्हा दाखल करण्यात आला आहे. पोलिस उपनिरीक्षक पवार या प्रकरणाचा पुढील तपास करत आहेत. अशा प्रकारे अपघातानंतर पळून जाणाऱ्या वाहनचालकांवर कठोर कारवाई करण्याचे आवाहन स्थानिक नागरिकांनी केले आहे.