पुणे, ७ सप्टेंबर: पुणे-मुंबई जुन्या हायवेवर (Pune-Mumbai old highway) सोमाटणे टोल नाक्याजवळ उभ्या असलेल्या एका ट्रकमुळे (Truck) भीषण अपघात होऊन एका ५२ वर्षीय महिलेचा दुर्दैवी मृत्यू झाला. या अपघातानंतर ट्रकचालक कोणतीही मदत न करता घटनास्थळावरून पळून गेला.
काय आहे प्रकरण?
हा अपघात २ सप्टेंबर, २०२५ रोजी रात्री ११.४५ वाजताच्या सुमारास सोमाटणे टोल नाक्यापुढील सुवर्णा लॉजसमोर घडला. फिर्यादी शैलेश रेवानाथ हेमाडे (वय ३५), जे दूध व्यवसाय करतात, यांनी तळेगाव दाभाडे पोलिस स्टेशनमध्ये तक्रार दाखल केली आहे.
फिर्यादी शैलेश हेमाडे त्यांच्या मारुती सुझुकी कारमधून पुणे दिशेने जात होते. त्याचवेळी समोरून येणाऱ्या वाहनांच्या प्रखर लाईटमुळे त्यांचे डोळे दिपले आणि त्यांना रस्ता नीट दिसला नाही. याच दरम्यान, MH ४२ AR ५१५२ या क्रमांकाचा एक ट्रक कोणत्याही सुरक्षेचे उपाय न करता आणि पाठीमागील चाक रस्त्यावर ठेवून बेकायदेशीरपणे उभा होता.
शैलेश यांच्या कारची या उभ्या असलेल्या ट्रकला जोरदार धडक बसली. या अपघातात शैलेश यांना किरकोळ दुखापत झाली, मात्र त्यांच्यासोबत असलेल्या त्यांच्या आई, सावित्रा रेवानाथ हेमाडे (वय ५२), यांच्या डोक्याला गंभीर दुखापत झाली. त्यांना उपचारासाठी रुग्णालयात दाखल केले असता, उपचारादरम्यान त्यांचा मृत्यू झाला. अपघात घडल्यानंतर ट्रकचालक कोणताही मदत न करता किंवा पोलिसांना माहिती न देता घटनास्थळावरून पळून गेला.
या प्रकरणी, पोलिसांनी अज्ञात ट्रकचालकाविरुद्ध तळेगाव दाभाडे पो.स्टे. गु.र.नं. २४०/२०२५, भा.न्या. सं. कलम १०६(१), १२५, १२५(ए), २८५ आणि मोटार वाहन कायदा कलम १२२, १७७ नुसार गुन्हा दाखल केला आहे. पोलीस आरोपीचा शोध घेत आहेत.