पुणे, ९ सप्टेंबर: पिंपरी-चिंचवड शहरात गणेशोत्सवादरम्यान (Ganeshotsav) मोठ्या क्षमतेच्या डीजे सिस्टिम (DJ system) आणि लेझर लाईटच्या वापराला बंदी असतानाही, आकुर्डीतील एका गणेश मंडळाने या नियमांचे उल्लंघन केले आहे. पोलिसांनी या मंडळाच्या अध्यक्षासह इतर आरोपींवर गुन्हा दाखल केला आहे, ज्यामुळे ध्वनिप्रदूषण आणि इतर नियमांचे उल्लंघन करणाऱ्या मंडळांना इशारा मिळाला आहे.
काय आहे प्रकरण?
ही घटना ६ सप्टेंबर, २०२५ रोजी रात्री ८.३४ वाजता आकुर्डी येथील छत्रपती शिवाजी महाराज पुतळ्यासमोर घडली. निगडी पोलीस स्टेशनचे पोलीस हवालदार प्रकाश नानासो गरदरे (वय ४२) यांनी याप्रकरणी तक्रार दाखल केली आहे.
पोलिसांनी दिलेल्या माहितीनुसार, पिंपरी-चिंचवड पोलीस आयुक्तांनी गणेशोत्सवादरम्यान ध्वनिप्रदूषण नियमांचे उल्लंघन होणार नाही, यासाठी मोठ्या क्षमतेच्या ध्वनी प्रक्षेपण यंत्रणा (डॉल्बी) आणि प्रखर लेझर लाईटच्या वापरावर बंदी घातली होती. असे असूनही, शिवाजी मित्र मंडळ, आकुर्डी यांच्या गणेश विसर्जन मिरवणुकीत नियमांचे उल्लंघन होत असल्याचे पोलिसांना आढळले.
या मंडळाने बंदी असलेल्या प्रखर बीम लाईट आणि लेझर लाईटचा वापर केला, तसेच मोठ्या आवाजाच्या डीजे सिस्टिमचा वापर करून ध्वनिप्रदूषण केले.
या प्रकरणी, पोलिसांनी शिवाजी मित्र मंडळाचे अध्यक्ष सूरज मारुती पिंजण (वय ३५) आणि डीजे सिस्टिमचा मालक व चालक यांच्याविरोधात गुन्हा दाखल केला आहे. आरोपींवर निगडी पो.स्टे. गु.र.नं. ४१८/२०२५ नुसार, भारतीय न्याय संहिता कलम २२३, २७०, २८०, २९३, ३(५) सह पर्यावरण (संरक्षण) अधिनियम १९८६, ध्वनिप्रदूषण (नियम व नियंत्रण) अधिनियम २००० आणि महाराष्ट्र पोलीस कायदा कलम ३३ सह १३१ नुसार गुन्हा दाखल करण्यात आला आहे.