वाघोलीमध्ये 'कट' मारल्याच्या किरकोळ कारणावरून तरुणाला लुटले; दुचाकी आणि मोबाईल हिसकावला, दोन आरोपी अटकेत
पुणे, ०८ ऑगस्ट २०२५: वाघोली परिसरात एका तरुणाला 'कट' मारल्याच्या क्षुल्लक कारणावरून दोन आरोपींनी मारहाण करून त्याची दुचाकी आणि मोबाईल जबरदस्तीने हिसकावून नेल्याची घटना घडली आहे. पोलिसांनी या प्रकरणी दोन्ही आरोपींना अटक केली आहे.
नेमकी काय घडली घटना?
रविवार (दि. ०३ ऑगस्ट २०२५) रोजी रात्री ११:१५ वाजण्याच्या सुमारास ही घटना घडली. वाघोलीतील आव्हाळवाडी खराडी रोडवरील सावली हॉटेलसमोर हा प्रकार घडला.
फिर्यादी (वय २२, रा. राजुरी, जि. बीड) हे त्यांच्या दुचाकीवरून जात असताना, आरोपी तुषार गोरख चांदणे (वय २०, रा. हवेली, पुणे) आणि नितीन रमेश कुसळे (वय २१, रा. हवेली, पुणे) यांनी त्यांना अडवले.
'कट' का मारला, या किरकोळ कारणावरून त्यांनी फिर्यादीला शिवीगाळ करत मारहाण केली. त्यानंतर त्यांनी जीवे मारण्याची धमकी देत फिर्यादीच्या ताब्यातील ५५,००० रुपये किमतीचा मोबाईल आणि २०,००० रुपये किमतीची दुचाकी जबरदस्तीने हिसकावून घेतली आणि पळून गेले.
पोलिसांची कारवाई
या प्रकरणी वाघोली पोलीस ठाण्यात गु.र.नं. ३९९/२०२५, भारतीय न्याय संहिता कलम ३०९ (४), ११५ (२), ३५२ नुसार गुन्हा दाखल करण्यात आला आहे.
पोलिसांनी तात्काळ कारवाई करत आरोपी तुषार चांदणे आणि नितीन कुसळे यांना अटक केली आहे. पोलीस उपनिरीक्षक शेंडगे या प्रकरणाचा पुढील तपास करत आहेत. किरकोळ वादातून मारहाण करून चोरी करणाऱ्या अशा गुन्हेगारांवर कठोर कारवाई केली जाईल, असे पोलिसांनी सांगितले आहे.