Pune : हिंजवडी-माण येथील पीएमपीएल बस स्टॉप (PMPL bus stop at Hinjewadi-Maan) वर एका धक्कादायक घटनेत, बस थांबवली नाही या क्षुल्लक कारणावरून एका बस कंडक्टरला सिमेंट ब्लॉकने मारहाण करण्यात आली. या हल्ल्यात कंडक्टर गंभीर जखमी झाला आहे.
नेमकी काय घडली घटना ?
बुधवारी (दि. ३० जुलै २०२५) रात्री ९:०० वाजण्याच्या सुमारास ही घटना घडली. हिंजवडी-माण पीएमपीएल बस स्टॉपवर, फुलांच्या हारांच्या दुकानासमोर हा प्रकार घडला.
फिर्यादी विकास दयाकर गायकवाड (वय ४३, धंदा-नोकरी, रा. देहूरोड, पुणे) हे पीएमपीएल बसमध्ये कंडक्टर म्हणून कर्तव्यावर होते. त्यांची बस (क्र. एमएच १४ एचटी ५०७१) फुलांच्या हारांच्या दुकानासमोर १०० नंबर थांब्यावर का थांबवली नाही, या कारणावरून भागवत उत्तम त्रिंबके (वय २५, रा. गवारेवाडी, फेज ३, माण, ता. मुळशी, जि. पुणे) याने विकास गायकवाड यांच्याशी वाद घालण्यास सुरुवात केली.
वादाचे रूपांतर हाणामारीत झाले. भागवत त्रिंबकेने बाजूला पडलेला सिमेंटचा ब्लॉक उचलून विकास गायकवाड आणि त्यांच्यासोबत असलेले जोडीदार लक्ष्मण सांबळे यांच्या डोक्यात मारला. यात ते दोघेही जखमी झाले. यावेळी, दिगंबर कुंडलिक त्रिंबके (वय ५२, रा. गवारेवाडी, फेज ३, माण, ता. मुळशी, जि. पुणे) आणि एक अनोळखी इसम यांनीही विकास गायकवाड यांना शिवीगाळ केली.
पोलिसांची कारवाई
या प्रकरणी हिंजवडी पोलीस ठाण्यात गु.र.नं. ५०४/२०२५, भारतीय न्याय संहिता कलम ११८ (१), ३५२, ३ (५) नुसार गुन्हा दाखल करण्यात आला आहे.
पोलिसांनी भागवत उत्तम त्रिंबके आणि दिगंबर कुंडलिक त्रिंबके यांच्यासह एका अनोळखी इसमाविरोधात गुन्हा दाखल केला आहे. या आरोपींना अद्याप अटक करण्यात आलेली नाही. भररस्त्यात बस कर्मचाऱ्याला मारहाण केल्याच्या या घटनेमुळे प्रवाशांच्या सुरक्षेचा प्रश्न ऐरणीवर आला आहे.