फुरसुंगी, दि. १३ ऑगस्ट - फुरसुंगी येथील राचंदवाडी स्मशानभूमीजवळ राहणाऱ्या सीमा अक्षय राखपसरे (वय २४) या विवाहित तरुणीच्या संशयास्पद मृत्यूने एकच खळबळ उडाली आहे. पोलिसांनी ही आत्महत्या असल्याचे म्हटले असले, तरी सीमेच्या माहेरच्यांनी हा खून असल्याचा आरोप केला आहे. सीमाच्या सासरच्यांकडून होणाऱ्या सततच्या छळाला कंटाळून तिने हे टोकाचे पाऊल उचलल्याचे फिर्यादीत नमूद करण्यात आले आहे.
नाशिकच्या पंचवटी येथील एका ५० वर्षीय व्यक्तीने या प्रकरणी फुरसुंगी पोलीस स्टेशनमध्ये गुन्हा दाखल केला आहे. त्यांच्या फिर्यादीनुसार, ६ जुलै २०२० पासून ते ६ ऑगस्ट २०२५ या कालावधीत सीमेचा पती, सासू, सासरे आणि इतर नातेवाईक तिचा छळ करत होते. माहेरून पैसे आणण्यासाठी तिच्यावर दबाव टाकला जात होता आणि तिला मानसिक त्रास दिला जात होता.
"छळानंतर गळफास"
फिर्यादीनुसार, सासरच्या मंडळींनी संगनमत करून सीमेचा शारीरिक आणि मानसिक छळ केला. या त्रासाला कंटाळून सीमाने राहत्या घरी पंख्याला ओढणीच्या साहाय्याने गळफास घेऊन आत्महत्या केली. या प्रकरणी फुरसुंगी पोलिसांनी गु. रजि. नं. २५०/२०२५ भा.न्या.सं. कलम १०८, ८५, ११५(२), ३५२, ३(५) नुसार गुन्हा दाखल केला आहे.
मात्र, सीमेच्या घरच्यांचे म्हणणे आहे की, ही आत्महत्या नसून पूर्वनियोजित खून आहे. सासरच्या मंडळींनीच तिचा गळा दाबून खून केल्याचा आरोप त्यांनी केला आहे. या प्रकरणाचा तपास पोलीस उपनिरीक्षक बापुसाहेब खंदारे करत आहेत. सीमेचा मृत्यू नेमका कशामुळे झाला, हे पोलीस तपासातून समोर येईल. मात्र, या घटनेमुळे परिसरात संतापाचे वातावरण आहे.