पुणे: कोरेगाव पार्क परिसरात भरधाव वेगामुळे झालेल्या एका भीषण अपघातात १८ वर्षीय तरुणाचा दुर्दैवी मृत्यू झाला आहे. एका दुचाकीने धडक दिल्यानंतर तो तरुण रस्त्यावर पडला आणि त्यानंतर पाठीमागून येणाऱ्या टेम्पोने त्याला चिरडले. या घटनेनंतर दोन्ही चालक फरार झाले आहेत.
नेमकं काय घडलं?
१२ ऑगस्ट २०२५ रोजी सकाळी १०:३० वाजता ही दुर्दैवी घटना कोरेगाव पार्कमधील रांका ज्वेलर्स दुकानाजवळ घडली. या प्रकरणी २० वर्षीय महिलेने कोरेगाव पार्क पोलीस ठाण्यात फिर्याद दिली आहे. फिर्यादीनुसार, त्यांचा भाऊ शिवम कुमार सिंग (वय १८) हा आपल्या दुचाकीवरून जात होता.
त्यावेळी पाठीमागून आलेल्या एका अज्ञात दुचाकीस्वाराने त्याला जोरदार धडक दिली. या धडकेमुळे शिवम रस्त्यावर पडला. त्याच क्षणी, पाठीमागून भरधाव वेगाने येणाऱ्या एका टेम्पोने निष्काळजीपणे गाडी चालवत शिवमच्या अंगावरून टेम्पो घातला. या अपघातात शिवम गंभीर जखमी झाला आणि त्याचा जागीच मृत्यू झाला.
अज्ञात आरोपी फरार
हा अपघात घडल्यानंतर दोन्ही अज्ञात चालक घटनास्थळी न थांबता फरार झाले. पोलिसांनी या प्रकरणी अज्ञात मोटारसायकल चालक आणि टेम्पो चालकाविरोधात कोरेगाव पार्क पोलीस ठाण्यात गुन्हा दाखल केला आहे. भारतीय न्याय संहिता कलम २८१, १०६ (१), १२५ (ब) आणि मोटार वाहन कायदा कलम १८४, ११९/१७७ अंतर्गत गुन्हा दाखल करण्यात आला आहे.