पुणे: लोणीकंद पोलीस ठाण्याच्या हद्दीतील डोंगरगाव येथे कौटुंबिक छळाला कंटाळून एका १८ वर्षीय विवाहितेने आत्महत्या केल्याची धक्कादायक घटना समोर आली आहे. या प्रकरणी पोलिसांनी सासू आणि पतीवर गुन्हा दाखल करून सासूला अटक केली आहे.
नेमकं काय घडलं?
चंदननगर येथील रहिवासी असलेल्या एका ४१ वर्षीय व्यक्तीने याप्रकरणी फिर्याद दिली आहे. त्यांच्या भाचीचा, राणी मुंजाजी घाडगे (वय १८), विवाह भागवत अंकुश कदम याच्याशी झाला होता. लग्नानंतर काही दिवसांतच तिचा पती आणि सासू मुक्ता अंकुश कदम यांनी तिचा छळ करण्यास सुरुवात केली.
चारित्र्यावर संशय आणि मारहाण
राणीच्या चारित्र्यावर संशय घेऊन तिला पती आणि सासू वारंवार मारहाण करत होते. तसेच, तिला टोचून बोलून तिचा शारीरिक आणि मानसिक छळ केला जात होता. या सततच्या त्रासाला कंटाळून अखेर राणीने २४ मे २०२५ ते ८ ऑगस्ट २०२५ या कालावधीत आत्महत्या केली.
पती आणि सासूवर गुन्हा दाखल
या घटनेची माहिती मिळताच पोलिसांनी गुन्हा दाखल केला. लोणीकंद पोलीस ठाण्यात भा.न्या.सं.क. १०८, ११५ (२), ३ (५) अंतर्गत पती भागवत कदम आणि सासू मुक्ता कदम यांच्यावर गुन्हा दाखल करण्यात आला आहे. पोलिसांनी तातडीने कारवाई करत सासू मुक्ता कदम हिला अटक केली असून, पती भागवत कदम फरार आहे.