पिस्तुल दाखवून तरुणाला मारहाण; शिरगावमध्ये 'रोड रॉबरी' करणाऱ्याला अटक
पुणे: मावळ तालुक्यातील उर्से येथे एका तरुणाला अडवून त्याला मारहाण करून पिस्तुलचा धाक दाखवून लुटल्याची घटना समोर आली आहे. आरोपीने परिसरात दहशत निर्माण केली. शिरगाव पोलिसांनी तात्काळ कारवाई करत आरोपीला अटक केली आहे.
नेमकं काय घडलं?
१६ ऑगस्ट २०२५ रोजी रात्री ९:१० वाजता ही घटना उर्से ते परंदवडी रोडवर के.एल.टी. कंपनीजवळ घडली. याप्रकरणी निखिल उत्तम बेरगळ (वय २०) यांनी शिरगाव पोलीस ठाण्यात फिर्याद दिली आहे.
निखिल बेरगळ पायी जात असताना आरोपी विकेश उर्फ शेऱ्या राजू अडागळे (वय २४) याने त्याला अडवले. विकेशने निखिलला हाताने मारहाण केली आणि त्याच्याकडे असलेले पिस्तुल दाखवून धमकावले. त्यानंतर, त्याने निखिलच्या पॅन्टच्या खिशातून १,००० रुपये रोख रक्कम असलेले पाकीट जबरदस्तीने काढून घेतले.
पिस्तुल दाखवून दहशत निर्माण
निखिलला लुटल्यानंतर आरोपीने त्याला शिवीगाळ केली आणि धमकावले. विशेष म्हणजे, निखिलला वाचवण्यासाठी येणाऱ्या लोकांनाही त्याने पिस्तुलचा धाक दाखवून पळवून लावले, ज्यामुळे परिसरात भीतीचे वातावरण निर्माण झाले.